Според сеќавањата на Милтон Манаки, во 1905 година брат му Јанаки отпатувал во Англија каде купил камера од марката „Биоскоп” од продавницата на производителот „Чарлс Урбан трејдинг компани” во лондонската улица Руперт, број 48. Камерата имала сериски број 300. Со оваа камера браќата Манаки го снимиле првиот филм во југоисточна Европа, со нивната 114-годишна баба Деспина во главната улога. Затоа фестивалот на филмската камера го носи името на браќата Манаки, а фестивалските награди го носат името „Камера 300″.