Почина големиот пријател и поддржувач на ИФФК „Браќа Манаки“, Најџел Валтерс, човекот чија трага засекогаш ќе остане врежана во историјата на светската и европската кинематографија.

Nigel Walters беше многу повеќе од потпис зад камера. Тој беше визионер, мост меѓу генерации, амбасадор на кинематографијата како уметност и професија. Како поранешен претседател на IMAGO и истакнат член на British Society of Cinematographers (BSC), неговата посветеност кон развојот и признавањето на авторите на сликата беше неисцрпна.

За нашиот фестивал, Nigel беше пријател, поддржувач, гласник и човек со вистинска љубов кон Манакиевата традиција. Неговото присуство во Битола секогаш носеше топлина, остроумие и исклучителна професионална етика. Тој длабоко веруваше во вредноста на првиот фестивал посветен на кинематограферите и често зборуваше дека „духот на Манаки е важен за целата филмска заедница“.

Со неговото заминување, кинематографската заедница губи еден од најголемите чувари на визуелниот јазик , а ние, еден искрен пријател.

ИФФК „Браќа Манаки“ ја изразува својата длабока благодарност за целокупниот негов придонес и упатува длабоко сочувство до неговото семејство, колегите од BSC и IMAGO, и сите кои имаа чест да го познаваат.

Неговата светлина останува.

Неговиот кадар продолжува да нè учи.