Филмот „Малдорор“ на Фабрис ду Велц ја освои Наградата на публиката за најдобар филм на Мрежата на фестивали од Јадранскиот регион – Adriatic Audience Award, која свечено беше доделена на 31. Фестивал на авторски филм.

Целта на Наградата на публиката на Мрежата на фестивали од Јадранскиот регион, Adriatic Audience Award, е промоција и поголема видливост на европскиот филм, а наградата ќе му овозможи на филмот да биде прикажан и во кината на територијата на поранешна Југославија.

Филмот „Малдорор“ доби најмногу гласови од публиката со собирање на резултатите од сите фестивали членки на Мрежата на фестивали од Јадранскиот регион, вклучувајќи ги Сараевскиот филмски фестивал (БиХ), Филмскиот фестивал во Херцег Нови (Црна Гора), Љубљанскиот меѓународен филмски фестивал (Словенија), Фестивалот на авторски филм (Белград), Загреб филм фестивал (Хрватска) и „Браќа Манаки“ (Северна Македонија).

„Малдорор“ е фикционализирана приказна инспирирана од вистински настани во Белгија средината на деведесеттите години. После исчезнувањето на две девојчиња во 1995 година, младиот полицаец Пол Шартие се приклучува на тајната единица „Малдорор“, задолжена за следење на главниот осомничен. Кога операцијата пропаѓа, Пол – разочаран од системот – се впушта во самостојна истрага која прераснува во опсесија.

Фокусот на остварувањето е реалистичен приказ на борбата против длабоко вкоренетото зло и општеството што потфрла пред најранливите. „Малдорор“ е прв дел од планираната трилогија на Фабрис ду Велц за мрачната страна на белгиската историја, моќта и правдата. Светската премиера на филмот се одржа на фестивалот во Венеција.

Автор на визуелното решение за Наградата на публиката на Мрежата на фестивали од Јадранскиот регион, Adriatic Audience Award, е Срѓан Стефановиќ (1985), академски вајар и сликар.

Мрежата на фестивали од Јадранскиот регион е поддржана од потпрограмата MEDIA на Програмата Креативна Европа.